Urpekontzi misteriotsua izeneko ikuskizuna eskaini dute goizean Zumardiaundian. Hiru eta hamabi urte bitarteko umeentzako zuzendutako istorioa da, hain zuzen. Simon, Bobby eta Janis aspaldiko lagunak dira. Udako egun bero batean, asfaltoa atzean utzi eta hondartzara joatea erabakitzen dute. Uretan jolasean dabiltzala, urpekontzi itxurako zeozer ikusten dute urrutian, baina gauzak ez dira itxuraren araberakoak...
XX. mendeko euskal abesti ospetsuen moldaketak egin ditu hirukoteak. Izan ere, antzerkia ez ezik, musika eta dantza ere uztartzen dira kontaketan zehar. Modu horretan, Zumardiaundira gerturatu diren ikusleak zutik jartzea lortu du taldeak, musikaren erritmora dantzan eginez.