San Joan jaiak gerturatu ahala TAKEren ohitura izaten da saskibaloia kalera ateratzea. 3x3 lehiaketaren bitartez TAKEko harrobia gaur bere egunaz gozatzen ari da.
Goizean, Alondegia plaza hartu dute saskibaloi jokalari eta zaleek eta euren onena eman dute hiru hiruren kontrako lehiaketan. Joko garbiaren aldarria uneoro entzun da esatariaren ahotik eta neska-mutilek lehiaz disfrutatu dute, baloia saskiratzen ahalegintzen ziren bitartean.
Azeri beltzak, Malakak, Mutil koskorrak, Etxeko txoizoak, Okau, Winner, Atsedena Laukers, Coca Juniors, Iratxo urdinak, Txirifinak... bezalako taldeak elkarren lehian aritu dira Alondegian. Festa eta kirola uztartutik, TAKEren ekimenez, saskibaloia kale eta kaletarrei gerturatuz.
Arratsaldean, berriz, kadeteen, juniorren eta seniorren txanda izan da. San Frantzisko etorbidean jarri dituzte kantxak, eta herritar ugari gerturatu da partidez gozatzera. Nesken 10 talde eta mutilen 36 talde lehiatu dira.