Tolosako ikasleek buru osasunaren inguruan ikasturtean egin dutena lanketari amaiera emateko Espazio Lagunkoien Topaketa egin dute. Ez zaude bakarrik proiektuaren barruan kokatzen da Espazio Lagunkoien ekimena, eta helburua da buru osasunaren zaintzan eta prebentzioan arreta jartzea, gazteen ongizatea bermatzeko. Horretarako, ikasleek euren emozio eta kezkez "lasai eta era seguruan" hitz egiten dute Espazio Lagunkoi deiturikoetan. 
Bada, topaketa egin dute Inmakulada LH Ikastolan, eta askotariko tailerrak izan dituzte, ipuin kontaketa eta eskulanak, dantza eta yoga edota bertsolaritza eta antzerkia, eta ondoren, Edurne Pasaban, Agustin Erkizia, Irantzu Tolosa eta Iratxe Etxenikerekin mahai ingurua izan dute. 
Ikasle ugarik parte hartu dute tailerretan, eta mahai inguruan ere asko izan dira gaia arretaz jarraitu dutelarik. "Topaketa bat egin nahi izan dugu ikasleak konturatzeko bakarrik ez daudela, isiltasunari oihu egiteko, tabuak hausteko eta osasun mentalaz normaltasunez aritzeko", azaldu du Julen Domintxin ikasleak. Hala, proiektuaren bultzatzaileak "gustura" azaldu dira bai topaketak bai eta proiektuak, oro har izan duena harrera onarekin.
