Tarana Karim elkarteko kidea da eta herritarrei dei egin die bakoitzak ahal duena eskaini dezan. Higiene produktuak, sendagaiak, elikagaiak edota baldintza onetan dauden neguko arropak biltzen ari dira. Baita lo zakuak, mantak, esterilak edota kartoizko kaxak, paletak eta zintak ere.
Astelehenetik larunbatera, 10:00etatik 20:00etara daude lokalean, eta igandeetan ere bazkalostera arte bertan egon ohi direla kontatu du Karimek.
Bildutako materialaren zati bat bertan uzten dute, "hona iristen diren errefuxiatuentzat", baina gainerakoa kamioietan kargatu eta Irungo mugara bidaltzen dituzte, handik Poloniarako bidea hartzeko.
Jasotzen ari diren erantzunarekin "oso eskertuta" daudela esan du Karimek, eta eskerrak eman dizkie beren alea jarri duten Tolosaldeko herritarrei zein lanean ari diren boluntarioei.
