Tolosa&Co merkatari elkarteak larunbaterako egitarau zabala prestatu du, herritarrak Tolosara bertaratu eta beherapenek utzitako azken aleak eros ditzaten.
Honela, 10:00etik hasita eta 20:00era bitartean dendek beherapenetan dituzten produktuak kalera aterako dituzte. Gaztetxoenen gozamenerako, txu-txu trena herrian zehar ibiliko da bueltaka, 10:30-14:30 eta 16:30-19:30 ordutegia betez.
Arratsaldean berriro ere umeei begirako ekitaldia antolatu du Tolosa&Co elkarteak. Izan ere, erraldoi eta buruhandi konpartsaren kale animazioa izango da 16:30ean hasita eta 18:00ak bitartean. Eta azkenik, tolosarrek inauterien arrastoa oraindik gainean dutela, berriro ere txarangaz disfrutatzeko aukera izango dute 17:00-19:30 artean.
Azken batean, herritarrek txartelak astindu eta merkatariei denboraldiko azken produktuak agortzen laguntzeko helburua du Braderie azokak.