Alpino Uzturre Mendi Elkarteak irteera berri bat antolatu du igande goizerako. 8:00etan izango da irteera, San Frantzisko eliza atariko autobus geltokitik. Gero, Jaizkibelgo antzinako paradoretik abiatuko dira eta ibilbide zirkularra burutuko dute. "Lehenik, Jaizkibel gailurrerako bidean, Bidasoa inguruko eta Lapurdiko kosta ikusi ahal izango dugu. Ondoren, Hondarribia eta Pasaia arteko mugan, geldialdia egingo dugu Remigio Mendibururen La unión de los pueblos monumentua ezagutzeko. Azkenik, Labetxuraino jaitsiko gara, higatutako arrokek eragindako arte naturalaz gozatzeko", adierazi dute elkartetik. 9,3 kilometroko ibilbidea izango da, eta hiru ordu eta erdian egitea aurreikusten dute. Desnibel positibo metatua 587 metrokoa da. Nahi duenak, ikusgai du irteeraren inguruko azalpen bideoa.
Irteeran parte hartzeko interesa duenak, hiru modu ditu informazio gehigarria lortzeko edo izena emateko: Alpinouzturre.eus webgunea bisitatzea, info@alpinouzturre.eus helbide elektronikora mezua idaztea edota 943 652 789 telefono zenbakira deitzea. Autobusaren prezioa 10 eurokoa izango da bazkideentzat; gainerakoek, 11 euro ordaindu beharko dute.