Pandemia garaian, indarrean izan diren neurriei jarraituz, eta pertsonen arteko distantzia mantentzeko, ohiko hiru plazez gain, Trianguloan eta San Frantzisko pasealekuan kokatu dira, orain artean, azokako postuak.
Larrialdi egoera indargabetuta eta pandemia atzean uzten ari garen honetan, ohiko eremuetara itzuliko da larunbateroko azoka, pixkanaka. Gauzak horrela, lehen urrats modura, Trianguloko postuak Zerkausira lekualdatu dira; hala egin zuten pasa den Zaldunita bezperan. Horretarako, berrantolatu egin da Zerkausiko postuen kokapena.
Eraldaketa fisiko zein digitala
Pandemia garaia baliatu du udalak, Azoka Lagunak proiektua abiarazteaz gain, azoka garai berrietara egokitzeko urratsak egiteko eta larunbateroko azokaren eremuen azterketa eta berrantolaketa egiteko, azokak indartzeko estrategia zabal baten baitan. Azokagile eta ekoizleekin proposamena landu eta adostu ondoren, larunbatean antolaketa berria martxan jarri zen Zerkausian, eta datozen hilabeteetan lanketari jarraipena emango zaio, postuak berrantolatu eta azoka gune guztiei irudi bateratua emateko helburuarekin.