Gaur goizaldean Tolosako inauterietan izaten diren lapurretei aurre egiteko abian jarritako dispositibo berezi batean parte hartzen ari ziren ertzainek telefono mugikor baten lapurretaren berri izan dute. Lapurretaren tokira gerturatzean 32 urteko gizonezko bat atera dute jai girotik, lapurreta egiten saiatzen ari zela identifikatu ondoren. Gizonezkoak zeraman motxila miatu dutenean 8 telefono mugikor, diru zorro batzuk, 138 euro, dokumentazioa eta beste hainbat objektu aurkitu dizkiote. Segurtasun sailak esan du gizonezkoa atxilotu dutela lapurretak egotzita eta polizia egoitzara eraman dutela dagozkion eginbideak hasteko. Gizona gaur goizean zehar jarri dute agintari judizialaren eskuetan Tolosako Guardiako Epaitegian.
Oriako ertzain etxeko buruzagitzaren arabera, inauterietan telefono mugikor asko atzeman dituzte eta ertzain etxean dituzte. Horien jabeek bertan eskatu ditzakete dagokion salaketa jarri ondoren, telefonoaren jabetza egiaztatzen duen dokumentazioa aurkeztuta.