Goizeko 6:00ak. Atzo Tolosara gerturatutako parranda zale askok, nekeak eraginda, etxerako buelta hartu dute; tartean, ordea, badira oraindik ohean sartzeko gogorik ez dutenak. Bost axola die txistuaren soinuak; udaletxe atarian Udal Txistulari Bandak eskainiko duen alboradara gerturatu diren guztiek partekatzen duten gauza bakarra dute: festarako grina.
Eta hasi da alborada, Segurako Alborada obrarekin. Lehen notak entzutearekin batera, saltoka hasi dira herritarrak, anis edalontzia eskuan eta gailetak ahoan. Atzoko mozorro berarekin jarraitzen zuten gehienek; batzuek irudimen handikoak plazaratu dituzte: La Jodedera taldeko musikariak bertan izan dira, eta Tolosako udal langileek (brigadakoek) kide berri baten laguntza izan dute. Behin udaletxe atariko lanak amaituta, Berdura plazara joan dira txistulariak, eta bertatik, Gorriti plazara.
