Mozorroz garbitu dute kalea

Tolosaldeko Ataria 2022ko ots. 28a, 14:55

Zaborrez beteta esnatu dira gaur Tolosako kale bazterrak; ajeari buelta emateko asmoz, bigarren egunez, mozorro festa erraldoia bilakatu da San Frantzisko ibiltoki ingurua.

Zaldunita irudimenez jositako eguna izan bazen, Astelenitak ere zertzelada ederrak utzi dizkigu. Atzo ikusi ziren zenbait mozorroetako gaiak errepikatu  dituzte herritarrek, baina beste modu batera. Jose Inazio Munillaren askatasuna aldarrikatu dute batzuek, beste batzuek, Georgie Dann berpiztea lortu eta Barbacoa kantatzen aritu dira goiz osoan zehar, Oria ibaiertza hondartza bilakatu dute berriro, eta Emeki zentroko haurdunak kalera atera dira gaur, txarangen atzetik saltoka ibiliz.

Horrez gain, Zaldunita taldeak, Lopez Mendizabal plazan jarri du konpartsa, Joxe Mari Barriolarekin batera; Pisako dorrea eta bertako turistak Tolosara etorri dira, baita Miamiko puntistak ere. Gipuzkoako armarriari buelta bat eman eta hura garai berrietara egokitu eta eraberritzeko eskaera egin nahi izan du herritar batek. Azkenik, Tolosako Inauteriak Euskal Herriko festa onenetakoak direla esan ohi dute; bada, gaur, Euskal Herriko beste zenbait festetako pertsonaiak izan dira bertan: Marijaia, Zeledon, San Prudentzio eguneko tronpeta jotzaileak, eta baita bordon dantzariak eta txistulariak ere.

Erlazionatuak

Astelenitan, askotariko musika

Tolosaldeko Ataria 2022 ots 28 Tolosa

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!