Candanchun, larunbatean, hirugarren jardunaldia izan zen jokoan, eta estilo libreko probak egin zituzten. Zerua estalia eta elur bustia eta motela zegoen. 91 partaidek parte hartu zuten, eta txapelketetan lehiatzen zirenez gain, Aragoiko, Madrilgo eta Frantziako Azun elkarteko eskiatzaileek parte hartu zuten. Euskadi eta Nafarroako txapelketen sailkapen bateratuan, Alpino Uzturrekoek emaitza hauek lortu zituzten: 14 urtez azpiko nesketan (5 kilometro) June Aranburu izan zen irabazle; 16 urtez azpiko mutiletan (5 km.) Hodei Juaristi bigarren; 16 urtez azpiko nesketan (5 km.) Laia Azpilgain bigarren; 18 urtez azpiko nesketan (10 km.) Alaia Juaristi irabazle eta Laia Arakama bosgarren; eta mutilen absolutu mailan (10 km.) Igor Aranburu bosgarren eta Mikel Plazas seigarren izan ziren.
Igandean, erreleboan txanda izan zen. Maila absolutuan (3x5 km.), Alpino Uzturreko Mikel Plazas, Igor Aranburu eta Alaia Juaristi hirukotea bigarren izan zen. Gaztetxoen mailan (3x2,5 km.), Alpino Uzturreko Laia Azpilgain, June Aranburu eta Hodei Juaristi hirukotea bigarren izan zen. Igandean eguraldi eguzkitsua eta elur azkarra izan zuten.