Anbulantzia, suhiltzaileak, Udaltzaingoa eta Ertzaintza bertaratu dira eremura, baina ez da beharrezkoa izan inor artatzea. Tolosako Udalak esan du gidariari ohiko frogak egin dizkiotela eta negatibo eman duela guztietan. Gertaera aztertzen ari dira eta autobusa bera monitorizatua dagoenez, akatsa non izan den jakin ahalko dutela esan du udalak, aurrerantzean horrelakorik berriz ere gerta ez dadin. Hiribus zerbitzua berrabiarazten ari dira eta ordezko autobus bat jarriko dute goizean zehar. Hiribus elektrikoa konpondu bitartean, ordezko autobusarekin eskainiko dute zerbitzua.
Istripu ikusgarria
Postontziak eta seinaleak aurretik eraman ditu Hiribusak. Lekukoen arabera gidariak ez zekien zer gertatu den: "Balaztari eman eta eman ibili dela baina autobusak jaramonik ez diola egin esan du". Bidaiarien artean ez da zauriturik egon. Ezeiza gozotegian ere kalte materialak bakarrik egon dira. "Eskerrak une horretan ogia erosten ez zegoen inor. Izugarrizko soinua entzun dugu. Autobusa barrura sartuko zela pentsatzen genuen. Urduri baina bidaiarien artean haurrak zeudela ikusi eta gozotegi barrura ekarri ditugu. Ikaratuta eta negarrez zeuden baina ezer larririk ez zuten. Zorionez ez da ezer larririk gertatu". Kanpoan lekukoek ere hori esaten zuten. Bizilagun baten esanetan, "trumoi moduko bat entzun dut". Atariaren aurrean autobusa zegoela ikusi du ondoren: "Bizilagun batek ezin zuen kalera atera, atariaren aurrean autobusa zegoelako. Gidariarengana gerturatu gara lasaitzeko, eta berak ere ez zuen ulertzen zer gertatu den". Tolosako Udaltzaingoak, ildo beretik, istripua zerk eragin duen aztertzen ari direla azaldu du.
Hiribusa mugitzeko lanetan ari dira oraindik. Garabi handiago baten beharra ikusi dute, izan ere, mugitzeko heldulekua erabat puskatuta zeukan Hiribus elektrikoak. Zerbitzua ere eten egin behar izan dute baina 12:30ean, Tolosako Udalak jakinarazi duenez, zerbitzua berriz martxan da.