Mikel Larrañaga aizkolariak desafioa bota dio Iker Vicenteri, hamabi oinbiko zeinek azkarrago ebaki. Azpeitiarrak jarri nahi du egurra eta apustuari buruz hitz egiteko hitzordua jarri dio Vicenteri Tolosako Kantabrikon, datorren urtarrilaren 5ean. Egin beharreko lanen eta jokatu beharreko diruaren inguruan hitz egiteko prest agertu da Larrañaga, nahiz eta 9.000 euroko kopurua jokatzeko aukera aipatu duen.
Iker Vicente Euskal Herriko txapeldun geratu zen 2019an eta Aizkolari Txapelketa Nagusia irabazi du azkeneko bi urteetan. Okasio guztietan txapeldunorde geratu da Larrañaga. Dena den, aurten, Urrezko Kopan nagusitu zitzaion gipuzkoarra nafarrari, hamabi kanaerdiko ebakitzeko lanetan.
Bigarren hitzordu bat Kantabrikon
Joxean Etxeberria aizkolariak, bestalde, desafioa bota die Sherpa.ai Aizkolari Txapelketa Nagusiko sei finalistei. Hamar kanaerdiko ebaki eta hamar kilometroko korrika saioa egiteko apustua jokatu nahi du nafarrak eta baldintza bezala jarri du apusturako egurra berak jartzea. Tolosako zezen plazan jokatzeko aukera jarri du mahai gainean.
Apustuaz hitz egiteko hitzordua jarri du Etxeberriak Tolosako Kantabrikon, urtarrilaren 8an, 20:00etan. Iker Vicente, Mikel Larrañaga, Eneko Otaño, Aitzol Atutxa, Julen Alberdi eta Jon Irazu izan ziren Sherpa.ai Aizkolari Txapelketa Nagusiko finalistak, eta honenbestez, desafioari erantzuteko aukera izango dutenak.