Asuncion ospitaleak programatutako kirurgiak bertan behera utzi ditu, COVID-19aren intzidentziak gora egin duelako. Horrela, Osakidetzaren neurriekin bat egin duela esan du, ospitaleetako jarduera kirurgikoaren zati bat geldiaraziz. Tolosako zentroak premiazko kirurgiei eta atzeratu ezin diren onkologikoei soilik emango die arreta.
Asuncioneko arduradunek esan dute, COVID-19ak eragindako ospitaleratze eskaera handiari erantzuteko dituen baliabide guztiak erabilgarri izan nahi dituela eta hori dela eta, COVID gaixoentzat prestatuta dauden oheak 14tik 21era igoko ditu. Gainera lau unitate dituen Arnas Zainketa Intentsiboko Unitate bat jarriko du martxan ezohiko aireztapen-neurriak behar dituzten COVID pazienteak artatzeko.
