Aurten ere Tolosako Udalak Gabonetako argiekin apaindu ditu herriko kaleak, "urteko garai honetako ilusio eta magiari eusteko" eta "herriko merkataritza babesteko". Kale argiztapena bihar, abenduak 3, piztuko da, 17:30eak aldera. Zehazki, kontsumo txikiko 204.840 Led argi puntu jarri dira herrian.
Astean zehar, 23:00etan itzaliko dira argiak, eta ostiraletik igandera, berriz, gauerdian. Gau berezietan, abenduaren 24an eta 31n eta urtarrilaren 5ean, gau osoan zehar egongo dira piztuta. "Egunetik egunera, ilunabarra atzeratuz joan ahala, argiak beranduago piztuko dira, argiteria publikoarekin batera, erloju astronomikoak erabiliz", azaldu dute udaletik.
Gune ezberdinak argiztatuko dira aurten ere, hala nola, eraikinak, plazak, kaleak, eta baita auzo eta landa auzoak ere. Gainera, apaingarri bereziak jarri dira Zerkausian, San Frantzisko pasealekuan, Araba etorbidean eta Pedro Tolosa pasealekuan, eta argi puntu berriak Batxiler Zaldibian. Kale argiztapenaren kostua 55.000 eurokoa izan da.
Argiteriaren inguruko iradokizunak udalak kudeatuko ditu, hortaz, herritarrek UDATEra jo beharko dute edozein argibide edo beharrizanetarako.