Tolosako Udalak aste hasieran azaldu zuen aurten Goxua azoka ez egitea erabaki dutela. Ekainean egin zuten lehen bilera gozogileekin eta irailean bigarrena, eta orduan hartu zuten erabakia. "Azokako postuak irailerako esleituta egon ohi dira, eta kasu honetan ez zen posible ikusten", azaldu zuen Nerea Letamendia Tolosako Udaleko azoketako zinegotziak.
Bada, azoka berezia egingo ez badute ere, Goxua azokari keinu bat egingo diote gozogileek larunbat honetan. Izan ere, gozoak banatuko dituzte Tolosako Saizar, Gozona, Rafa Gorrotxategi eta Eceiza artisau-gozotegietan. Udalak herritarrak animatu ditu gozotegietara hurbildu daitezen.
Gozogintzarekin lotuta, bestalde, Tolosa Gourmetek gozogintzaren inguruko lan antropologikoa egin duela ere azaldu dute udaletik, eta lan horrekin datozen urteetan "zerbait polita" egin ahalko dutela esan dute.