San Esteban auzo elkarteak antolatzen du urtero Tolosako Herri Krosa. Goizean, giro ederrarekin egin dute lasterketa 165 korrikalarik; helmugara 153 parte hartzaile iritsi dira. 11:00etan abiatu dira San Esteban auzotik, eta leku berean izan dute helmuga 8,1 kilometroren ondoren.
Denetan azkarrena Ekain Larrea Aranguren antzuolarra izan da, 25:48ko denborarekin; bigarren postuan, Joseba Olaetxea Amenabar tolosarra helmugaratu da 25:56ko denboran; eta jarraian, 27:03ko denbora eginez, Iker Manso Blazquez tolosarrak gurutzatu du helmugako marra.
Emakumeetan, berriz, Usoa Ostolaza Zabala leitzarra izan da helmugaratzen lehena, 30:10eko denborarekin; berehala izan du atzetik Izaro Rubio Lasa ordiziarra 30:19ko denboran; podiuma osatzen hirugarrena Izaro Perurena tolosarra izan da, 30:52ko denbora eginda.
Lehen lasterkari tolosarrak Izaro Perurena eta Iker Manso izan dira. Helduen lasterketaren ostean etorri da haurren txanda: Txiki krosa. Bi proba egin dituzte; batetik 6 eta 8 urte artekoentzat, eta bestetik 8 eta 14 urte artekoentzat.