Tolosako Herri Krosa egin da gaur goizean eta horren atzetik etorri da Txiki krosa ere. Bi proba prestatu dituzte: 6 eta 8 urte artekoentzat 500 metroko ibilbidea, eta 8 eta 14 urte artekoentzat 1.250 metrokoa. Umore ederrean egin dituzte bi ibilbideak gaztetxoenek. Denera, 202 haurrek hartu dute parte.
Aurten, berrikuntza gisa, helburu solidarioa izan du txikienen lasterketak. Parte hartu dutenek, dortsala hartzerakoan, eskolako materiala utzi dute. Bildutako materiala Tolosaldea Sahararekin elkarteak jaso du, Saharako errefuxiatuen kanpamentuetara eramateko. Parte hartzaileek kamiseta jaso dute. Lasterketan zehar, lagun izan dute Estebania auzoko erraldoia.