Amua, pozarekin batera, euskara eta opariak ere izan direla aitortu beharra dago. Mintzapoza tonbola joko bihurtu da Tolosan paseatzen ari zirenentzat larunbat goiz honetan. Galtzaundiko kideek gurutzegrama bat eman diete parte hartu nahi zutenei, eta erantzun guztiak zuzenak izanez gero, bueltan boleto bat jaso dute, opari baterako aukera, alegia. Guztia dohainik, gainera.
Orotara, 70 opari banatzeko intentzioa zuten Galtzaundiko kideek. Eta helburua, Galtzaundi euskara taldeak antolatutako oro bezala: euskararen bultzada. Kasu honetan, Mintzapoza tonbolaren bitartez, Mintzalaguna egitasmoa ezagutarazi eta jende gehiago bere baitan biltzea da.
Eguzkia zeruan eta giroa kalean, Galtzaundiko kideek larunbata girotzea izan dute helburu. Horrela aitortu du, bederen, Idoia Lahidalgak: "Mintzapoza lelopean izango da aurten Mintzalaguna egitasmoa, eta poztasun horrekin kutsatuta tonbola bat jarri dugu gaur Tolosan, jendeari eskaintzeko eta sariak banatzeko". Musikak lagundu die jendea erakartzen eta 'poza' zabaltzen.
Mintzalaguna, zabal-zabalik
Idoia Lahidalgak, Tolosaldeko Mintzalaguna egitasmoaren arduradunak proiektuaren helburua azpimarratu du: "Euskara ikasten ari diren horiei, astean egun bat eta ordubetez, euskara praktikatzeko eremu bat, espazio bat, lagunarte bat eskaintzea da, beraien euskara maila horretatik hanka sartzeen lotsa kentzeko, praktika horretan askatzeko. Azken batean, helburua euskara geroz eta gehiago erabiltzea da".
Honela, oraindik badago aukera Mintzalaguna egitasmoan parte hartzeko. Izen ematea doakoa da, eta ikasturte osoan egongo da irekita. Mintzalagunean parte hartu nahi dutenek herriko udaletxera jo dezakete, edota Galtzaundi Euskara Taldearen egoitzara joan beharko dute izena ematera. Bestetik, online ere eman daiteke izena: hemen.