Tratuan dago arrakasta

Hala ere, pixkanaka, eta bezeroen fideltasunari esker, lehen zuten erritmoa «berreskuratzen» doazela aitortu du. «Terraza bat izateak ere asko laguntzen du, eta beraz, alde horretatik zorionekoak gara».

Euskal Herria plaza «kokapen oso egokia» dela nabarmentzen du. Gazteen artean, gainera, lagunekin zerbait hartuz egoteko ohiko lekua da. «Hasi ginenean, ez nuen uste halako arrakasta izango zuenik, baina pandemiaren eraginez, geroz eta gazte gehiago ibiltzen da hemen, eta harrituta gaude. Hala ere, aldaketa naturala izan da, eta ez guk bilatu dugun zerbait». Tolosako nahiz eskualdeko gainerako herrietako gazteen artean arrakasta duen taberna bada ere, bertako eskaintza ez da adin-tarte horretara soilik mugatzen. «Guk ez dugu aukeratzen nor etorriko den hona, eta adin guztietako herritarrak izaten ditugu. Badakite etortzen den oro ongi etorria izaten dela».

Pandemiak eragindako beste aldaketa bat, gosariak eskaintzearena izan da; herrian, gainera, ez dira asko otordu horretarako prestatutako tabernak. «Ordutegia zela eta, tabernak irekitzen hasi ginenean, gauez lehenago itxi behar genuen. Ondorioz, lehenago zabaldu eta bezeroei bertan gosaltzeko aukera eskaintzen hastea erabaki genuen. Lehen ez genuen horrelakorik eskaintzen, baina sekulako harrera izan du eta orain mantentzea erabaki dugu».

Pintxoak eta errazioak ere askotarikoak izaten dira. «Asteburuetan bereziagoak egiten ditugu, eta itsas zapoa tenpuran edota urdaiazpikoa, foie eta sueztitutako tipula duen ogi txigortua dira arrakasta handiena dutenak». Hanburgesak ere bereziak dituzte. Edarien kasuan, bertako eta nazioarteko bermutak eta ardoak dituzte, bezeroek denetik dastatzeko aukera izan dezaten. Oraingoz, «oso gustura» daudela dio; «hona datorrenarenganako arretan dago gakoa, ondo zaindu behar dugu, lasaitasuna transmitituz».