Euskal Herriko Pentsiodunen Mugimenduaren barruan, Gipuzkoako pentsiodunek antolatuta gaur eman diote hasiera Gipuzkoa zeharkatuko duen bizikleta martxari. Errenterian atera dira lehen txirrindulariak pentsio publiko duinak eskatuz, eta arratsaldean sartu da Tolosaldera bizikleta martxan. Eskualdeko herri askotatik pasa da gaur, eta «gustura» agertu dira pentsiodunak, herri askotan, harrera ona egin dietelako. Esaterako, Amasa-Villabonako erretirodunak zain izan zituzten harrera beroa egiteko, eta jarraian, Anoetarako bidea hartu zuten, txalo eta oihu artean.
Tolosako pentsiodunen elkarteak lanketa egin du herriko elkarte eta eragile ezberdinekin, eta Anoetan zuten hitzordua jarrita guztiek batera etapari amaiera Tolosan emateko. Herria zeharkatu ostean, Trianguloa plazan zain zituzten eragileak eta herritarrak, batukadaren erritmora. Lehen etapa Tolosan amaituta ekitaldia egin dute Trianguloa plazan. 1.080 euroko gutxieneko pentsio eskatzen dute, eta, besteak beste, «murrizketarik ez», aldarrikatu dute guztiek, "lan, pentsio eta bizitza duinaren" eskatuz. Ekitaldian aldarrikapen mezuez gain, musika eta bertsoak izan dira.
Bihar, berriz ere bizikletak hartuko dituzte bigarren etapari ekiteko. 09:00etan aterako dira Tolosatik, eta 09:30ak aldera Alegiara iritsiko dira, ondoren, Ikaztegietatik Goierrira pasatzeko.
HIRU URTE BORROKAN
Hiru urte daramate borrokan erretirodunek, eta larunbatean Donostiara iritsi arte mezu garbiak zabalduko dituzte, herriz herri.
Azken deia herritar guztientzat egina dute. Donostian, larunbatean, 17:00etan abiatuko da manifestazioa Alderdi Ederretik.
Pentsiodunek antolatu duten bizikleta martxa gaur sartu da Tolosaldera, eta Tolosan bukatu dute etapa, hainbat herritatik pasa eta gero. Pentsio publiko duinen alde egiteko, bihar, Tolosatik abiatuko da bigarren etapa eta Goierrirako bidea egingo dute.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!