Egoerak bultzatuta, ez da Korrikarik egin aurten, baina, euskararen aldeko lekukoa atera dute Euskal Herriko 80 herritan antolatutako ekitaldietan. Tolosa izan da herri horietako bat. Plaza Zaharrean egin den ekitaldian, Dana eman bihar jako, maite dan askatasunari eta Izarren hautsa abestiak izan dira entzungai Irene Lopezen eskutik. May Gorostiagak jarri du umore ukitua, euskara eta neurriak uztartuz burutu duen bakarrizketa saioarekin.
Idoia Bengoetxea AEK-ko kideak irakurri du ondoren, ekitaldi guztietan, Bultza euskaltegiak! Bultza euskara! lelopean entzun den mezua. Egungo egoerak laguntzen ez duen arren, 40.000 herritar inguru ari direla euskara ikasten nabarmendu nahi izan dute, euren esfortzua eskertuz. Ildo horretatik, Euskal Herriko herritarren %55 erdaldunak direla gogoratu dute AEK-tik, eta ondorioz, lan handia dagoela oraindik egiteko. Euskaltegi sendoen beharra ere azpimarratu dute, "Euskal Herri osoko herritarrei euskara ikasteko aukera emateko", eta baita, "erakundeen bultzada estrategikoa". Baina, hori ez dela nahikoa zabaldu dute mezuan, "euskarak herria behar baitu".
22. Korrika egin izan balitz gaur bukatuko litzateke, eta AEK-tik azaldu dute duela 40 urte hasi zuten ekimena oraindik ere beharrezkoa dela. Hain justu, datorren urteari begira jarri dira, eta 2022. urteko martxoaren 31tik apirilaren 10era egingo den 22. Korrika prestatzen buru belarri ari direla esan dute mezuan.
