Gaur bete dira 45 urte Fronte Polisarioak Saharako Errepublika Arabiar Demokratikoa aldarrikatu zuenetik. Hori ospatzeko eta beraien borroka aldarrikatzeko elkartu dira goizean, Trianguloan, Tolosaldea Sahararekin elkarteak deituta, Maroko Mendebaldeko Saharatik at lelopean.
"Gure herriari ahotsa emateko, borrokalariei ahotsa emateko, errefuxiatuen kanpalekuetan giza laguntzaren menpe bizi direnei ahotsa emateko, Mendebaldeko Saharan bizi diren sahararrei ahotsa emateko" elkartu direla azaldu dute, "ezin ditugu ahaztu".
Elkartasun eta babes oihuen artean, azken boladan bortxatuak eta torturatuak izaten ari diren saharar aktibistak izan dituzte gogoan. "Ez da bidezkoa, XXI. mendean gaude, eta horrelako kasuak gertatu egiten dira oraindik", esan dute. Komunikabideek "isiltzen" dutena kontatzeko elkartu direla ere azpimarratu dute.
