Aitortza, erreparazioa eta berriz ez errepikatzea eskatuko dute

Aste honetan argitaratu dira Alberto Perote CESIDeko koronelaren eta Pedro Gomez-Nieto Guardia Zibileko kapitainaren arteko elkarrizketaren grabazio bat. Artxibo horretan, argi entzun daiteke nola Gomez Nietok aitortzen duen Mikel Zabalza nafarra torturatuta hil zutela Intxaurrondo kuartelean, poltsa jarrita eta nola azaltzen dion ere Joxean Lasa eta Joxi Zabala tolosarrak «buruan bi tiro» emanda hil zituztela. 

Gertaerari lotuta Sortuk elkarretaratzea egingo du larunbatean, 12:30ean, Trianguloan. «Grabaketan entzuten dena, herritar askorentzat sorpresa ez izan arren, agerian utzi du beste behin, behin eta berriz ezkutatzen saiatu diren estatu biolentzia hori existitu dela eta estatu aparatuetako arduradunak horren jakitun zirela, beste zerbait ez esatearren». Sortuk nabarmendu du «herri honetan oinaze larriarekin bizitzen ikasi behar izan» dela eta «gure herriko kaleetan Guardia Zibilaren, Espainiako Poliziaren zein Ertzaintzaren kuarteletan eragin zizkiguten astakeriek eragindako minak» oraindik ez direla sendatu. «Estatu biolentziaren egia argitara eramatea behar beharrezkoa dugu, biolentzia hori jasan dutenek merezita duten aitortza, erreparazioa eta ez errepikatzeko bermeekin batera, herri honek bake eta askatasun agertoki berri batetara aurrera egiteko», gaineratu du. Alderdiak esan du era berean, «estatu biolentzia hori posible» izan dela «hori ahalbidetzen zuen estatu itun bat existitzen zelako». «Gaur da eguna, oraindik inork ez duela guzti honetan izan duen ardura onartu. Gaur da eguna, oraindik orain torturak eta gerra zikina praktikatu dutenak inpunitate osoa izaten jarraitzen dutela», gaineratu du.