Datozen egunetan, Usabal kiroldegia eta Gazte Topagunea zabalik egongo dira, eta saltoki askok ere ateak irekita izango dituzte. Kultur etxeko hainbat erabiltzailek, ordea, salbuespen egoera honen aurrean, kultur etxea eta Udal Liburutegia datozen egunetan ez irekitzeko udalak hartutako erabakiarekiko desadostasuna plazaratu nahi izan dute.
Ospakizunik ezean, egokiena egunerokotasunari eustea dela diote, «betiere, ezarritako neurriak betez». Euren egunerokotasuna hautsi dutela diote, «benetan horretarako arrazoirik izan gabe. Tristea bada ere, aurtengo Ostegun Gizenean ez da jende multzorik izango udaletxe plazan, eta mozorroak datorren urtera arte gorde beharko ditugu».