Aurreko asteburuan Espainiako Kopa jokatzekoa zen Valentzian, eta asteburu honetan Valladoliden jokatzekoa zen Espainiako Txapelketan parte hartzeko asmoa zuten. Infantil mailako gimnastak ere lehiaketa horietan parte hartzekoak ziren.
Oraindik Espainiako Gimnastikako Federazioak ez du zehaztu noiz egingo diren lehiaketa horiek. Tolosa CF-ko gimnastei zain egotea tokatuko zaie beraz. Martxoko geldialditik ez dute txapelketarik egin, eta irrikaz zeuden hainbeste prestatu dituzten bi lehiaketa horietan parte hartzeko. Entrenatzaileek azaldu dutenez, «frustragarria da helburu bat ez izatea eta lanean jarraitzea, datarik ez izatea helburuak finkatzeko. Denboraldiko plangintza egitea ezinezkoa suertatzen da».
Bestalde, entrenatzaileek diotenez, «eskola kirolean eta amateur mailan egoera berdina da, hasi eta geratu gabiltza. Txapelketarik egingo den ezin da jakin gizartean dugun egoera kontuan izanik. Baina, haurrek aurrera egiteko eskola kirola eskaintzea beharrezkoa da». Bide batez, entrenatzaileek eskerrak eman dizkiete gimnasten familiei eta babesleei: «Denbora zail hauetan gurekin jarraitzen dute, eta beraiek gabe ezinezkoa izango litzateke kluba martxan izatea».