Hilaren 20an, Gipuzkoako eta Euskal Herriko errekorra ezartzea lortu zuen Tolosa CF Atletismo klubeko atletak, 18 urtez azpiko kategorian, 4 metro eta 55 zentimetroko jauzia egin ondoren. Hala ere, astebete beranduago, Donostiako Belodromoan ospatutako parte-hartze libreko probetan, 5 zentimetro garaiagoko jauzia egitea lortu zuen bigarren saiakeran, errekor berria ezarriz.
Irailean, 4 metro eta 35 zentimetroko jauzia egin zuen, Tolosako errekorra 10 zentimetrotan hobetuz. Hortaz, 4 metro eta 60 zentimetroko marka Tolosako errekor berria da.
Aurreko asteko marka lortu ondoren, Gipuzkoako Atletismo Federazioak egindako elkarrizketan, "oso gustura" zegoela azaldu zuen 17 urteko kirolari tolosarrak. "Oso ondo ari naiz entrenatzen, eta saio horietan egindako lanak fruituak ematen ditu gero txapelketetan".
Denboraldia hasi besterik ez da egin, eta jada bi errekor ezartzea lortu du. Emaitzak hobetzen jarraitu nahi du Martinez de Rituertok. "Espainiako Txapelketara joan eta ahal den emaitza onena lortzea da nire helburua. Marka hobetzen saiatuko naiz, eta ea aurreko postuetan egotea lortzen dudan".