Aurreko astean egin zen Ezpala gaztetxearen okupazioarekin lotutako gazte baten aurkako epaiketa. Astebeteko epean aurreikusi zuten epaia izatea eta dagoeneko eskuartean dute: errugabetzat jo dute gaztea. Tolosaldeko Gazte Fronteak argitu du, ordea, epaia ez dela irmoa, "jabeak bost egun dituelako apelazio helegitea jartzeko". Epaiketan bertan, fiskalak absoluzioa eskatu zuen auzipetuarentzat, eta eraikinaren jabeak onartu egin zuen epaituari gutxieneko zigorra ezartzea egozten zitzaizkion delituetako bategatik.
Tolosaldeko Gazte Fronteko kideek adierazi dutenez, "bide penala itxi arren, litekeena da eraikinaren jabeak bide zibila irekitzea". Hori horrela, Ezpalaren desalojo arriskua "handia" izan daitekeela uste dute.