Trianguloa plazatik abiatu da manifestazioa, eta zezen plazaraino joan ondoren, Trianguloa plazatik berriro pasa eta Alde Zaharretik itzulia egin dute. Segurtasun tartearekin egin dute mobilizazioa eta horrek ere luzeago egitea ekarri du, baina manifestazioaren muturra Trianguloa plazara iristen ari zela, Rondilla eta Korreo kaleak guztiz beteta zeuden. Ostalariak eta langileak, bezeroak eta hainbat kirol taldeetako kideak elkartu dira manifestazioan. Atzetik hainbat banatzaile joan dira euren furgonetekin. Mobilizazioan zehar txaloak jo dituzte parte hartzaileek, eta Trianguloa plazan elkartuta zeudela, txalo zaparrada handia eskaini die banatzaileei bertatik pasatzean.
Manifestazioaren bukaeran, Iñigo Asensiok testu bat irakurri du, tabernak babesleku direla gogoraraziz. Javi Riverok eskerrak eman dizkie parte hartzaile guztiei emandako babesarengatik, eta Josu Artutxak bertsoa abestu du:
Bapatean dena itxi
eta gorde behar giltza
langile asko kalean
ez da ez ona baldintza
nahiz neurri guztiak bete
zein gorra den Jaurlaritza
noizbait itzuliko gara
lortu nahian bagabiltza
babestu dugu kirola
kultura ta herrigintza
sozialki herritarrei
eman dizueu bizitza
milesker gaurkoagatik
harrotasuna da hitza
segi indar berarekin
babestuz ostalaritza
