Argazki galeria

«Berandu baino lehen, botikina Amarotzen»

Tolosaldeko Ataria 2020ko urr. 17a, 15:35

Amarotz auzoko bizilagunak kalera atera dira botikina eskatzeko; kotxe karabana batekin hasi dute eguna eta elkarretaratzea egin dute ondoren, Tolosako Plaza Zaharrean. "Prozesu burokratiko korapilotsu baten erdian, eta Eusko Jaurlaritzaren azken erantzunaren zain, eta egoera gehiegi luzatzen ari dela ikusita, mobilizatzea erabaki dugu, administrazioak gu ahaztu ez gaitzan", esan dute.

Tolosako Amarotz auzoan farmaziarik gabe daude otsailetik eta beraz, zailtasunak izaten ari dira sendagailak lortzeko, "hurbilen dagoen farmazia urrun dagoelako eta ondorioz, auzotar askok zailtasunak dituztelako bertara mugitzeko", esan du Aitziber Malkorra auzotarrak. Horregatik eskatzen dute botikina izatea.

Amarotz auzoko biztanleen %34 adinekoa dela gogoratu dute, baina hala ere auzoa ez dela geldirik geratu nabarmendu nahi izan dute. "Eskubidea da osasun laguntza egokia izatea eta medikazioa auzoan bertan eta medikuaren preskripzioaren unean bertan eskuratzea", azaldu du Malkorrak. "Deialdi honen ondoren beste batzuk etorriko dira eta behar diren guztiak, zailtasun fisikoak dituzten eta adinekoak diren pertsonek bizi kalitatea galdu ez dezaten eta Amarotzek bere botikina eduki dezan", gaineratu du.

"Denok gara Amarotz" eta "berandu baino lehen, botikina Amarotzen" esanaz bukatu dute deialdia, ondoren egin den osasun publikoaren aldeko manifestazioarekin bat eginaz.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!