Beste urte batez, Europako Mugikortasun Astearekin bat egin du Tolosako Udalak, eta hainbat ekintza antolatu dira aste honetarako. Horrela, udalaren Mugikortasun Planean jasotako helburuekin bat eginez, eta bertan landutako ekimenak abiaraziz, Larramendi eta Ibaiondo kaleen arteko bidegurutzea biribilgune bihurtzea izango da gauzatuko den ekintzetako bat. Hala, proba modura, gaur eta bihar biribilgune bat egongo da bidegurutzearen ordez, eta semaforoak itzalita egongo dira.
Neurri honekin Larramendi eta Ibaiondo inguruko trafiko fluxua arintzen den aztertu nahi da. Izan ere, aipatutako eremuan pertsona askok gaizki gurutzatzen dute errepidea, distantziak murrizteko. Gainera, bidegorriaren ondoko espaloietako bat estua denez, batzuetan, txirrindularien eta oinezkoen artean tirabirak sortzen dira. Horregatik, behin-behineko biribilgune honen helburua inguruko segurtasuna hobetzea eta fluxuak arintzea da.
Mugikortasun ikerketen arabera, semaforoak kentzeak eta biribilguneak jartzeak gatazkak murriztu eta fluxuak arintzen ditu. Hala, gaur eta bihar egingo diren proben emaitzak erabakigarriak izango dira inguru horretan hartu beharreko neurriak erabakitzeko.