Irailaren 9an, asteazkena, irekiko ditu ateak Tolosako Eduardo Mokoroa Udal Musika Eskolak ikasturte berriari ekiteko. Egungo egoerara egokitu dituzte musika eskola eta bertan ematen diren ikastaroak, eta hala, segurtasun berme guztiekin hasiko dira aurrez aurreko eskolak.
Lau urtetik aurrera, instrumentu bat jotzen eta taldean musika egiten ikasi daiteke udal musika eskolan, eta profesionalki musika ikasteko prestakuntza ere egin daiteke bertan, tartean, kontserbatoriorako eta goi mailako musika ikasketetarako sarrera-probak.
Segurtasun neurri zorrotzekin
Arestian aipatu bezala, aurrez aurreko eskolekin emango diote hasiera, eta horretarako beharrezko segurtasun neurri guztiak hartu dira. Hala, musika eskolak zehaztutako jarraibideak betetzea derrigorrezkoa izango da musika eskolako ikasleentzat zein gurasoentzat.
Musika eskolari buruzko zein ikasturte hasierari buruzko informazio gehiago jakin nahi izanez gero, musika@tolosa.eus helbidera idatzi edo 943 651 593 telefono zenbakira deitu daiteke.