Larunbatean, 03:00ak inguruan, etxean zegoen Hiru-ko langile batek mezu bidez jakin zuen COVID-19aren proban positibo eman zuela. Hori jakitean, Hiru-ko jabeak igandean taberna ez irekitzea erabaki zuen, "borondatez, prebentzio neurri bezala". Horrez gain, sare sozialetan egoeraren berri eman zuen, ondorengo mezuarekin amaituz: "Bihotz bihotzez sentitzen dugu egoera honek sortzu ditzaken eragozpenak".
Berria segidan zabaldu zen, eta Tolosako Udalak ere alkatearen mezua kaleratu zuen. Ataria-k ere albistearen berri eman zuen. Igandean, Hiru-ko lantalde osoak PCR probak egin zituen, baita ustez positiboa eman zuen langileak ere. Gaur jaso dituzte emaitzak eta esan diote positiboa "faltsua" zela. Lantalde osoak, gainera, negatibo eman du.
Hiru-ko arduradunak Osalanekin hitz egin du gaur, eta taberna berriro zabaltzeko arazorik ez dagoela esan diote. Ondorioz, bihartik aurrera Tolosako Hiru tabernak berriro ateak zabalduko ditu; berme batekin gainera, lantalde osoak COVID-19aren probetan negatibo eman baitu.