Azken orduetan positibo bana atzeman dituzte Tolosako Hiru tabernan eta Alegiarako bidean, N-1 errepidean, dagoen gasolindegiko kafetegi-jatetxean. Ondorioz, eta prebentzio modura, biak itxi dituzte. Osasun Sailarekin harremanetan daudela jakinarazi du Olatz Peon Tolosako alkateak, “neurri bereziak hartu beharko bagenitu horiek hartzeko”. Era berean, herritarrei eskatu die soilik sintomak badituzte deitzeko anbulategira (943 00 68 00), osasun etxea ez kolapsatzeko.
Protokolo guztiak martxan daudela nabarmendu du alkateak. Horregatik lasaitasun mezua helarazi nahi izan du eta arduraz jokatzen jarraitzeko eskatu du. Indarrean dauden neurriak errespetatzeko, jende pilaketak ekiditeko eta musukoa erabiltzeko ere eskatu du.
