Bedaiotar asko inkomunikatuta daude ostegunetik

Tolosako Bedaio auzoan kexu dira. Ostegunetik, hau da, martxoaren 12tik, interneterako konexiorik eta telefonorik gabe daude auzoaren zati handi batean. 

Ugartera jaitsi behar izaten dute kobertura bila, deiak egin edota whatsapp mezuak erantzutera.  "Oso haserre" agertu dira bizilagunak. Orain, "koronabirusa dela eta, etxean egon behar dugun garaian, ez daukagu ezer", diote. Seme-alabek ezin dituztela etxetik ikasketak jarraitu ere salatu dute.

Telelana ahoz aho dabilen honetan, ezin dute etxetik lanik egin: "Euskal Herri osoan ez daude azpiegiturak prestatuta. Ezinezkoa zaigu etxetik lana egitea, beraz, ez daitezela etxetik lan egitea bultzatzen saiatu. Jarri ditzatela baldintzak behar bezala herritar guztiontzat".

Ez zaie berria egoera. Urteak daramatzate zuntz optikoa sartzeko eskatzen. Tolosako auzo bakarra da egoera horretan, "negarra egiteko gogoa" sartzen zaiela diote. 

Era berean, adinekoak bizi diren etxeak badira, eta edozein larrialdiren aurrean, telefonorik ere ez dute. Edo ezin dira beraiekin harremanetan jarri. "Tele asistentziako aparatua dute batzuek, eta haiekin ere ezin dira harremanetan jarri".

"Kobrezko kablea izorratuta omen dago, eta zati batzuk baino ez dituzte konpontzen. Eta langileek beraiek esaten dizute, zuri konpondu dizut, baina auzokoa gabe utzi dut", kontatzen dute Bedaioko auzotarrek. Antza, ez dute osotasunean konpontzeko intentziorik.

Tolosako zentralitatik ADSL bidez iristen zaie internet zerbitzua, eta Bedaiora "0,8 edo 0,5 megabite iristen dira. Ez da ezer. Tarteka lortzen duzu zerbait jaso edo bidaltzea, baina orain hori izateagatik bakarrik ez dakit zer egingo genukeen". 

Kexu dira Gipuzkoako Foru Aldunditik eta Tolosako Udaletik ez dutela inolako babesik jasotzen. "Bi urte itxaron behar ditugu zuntz optikoa iristeko, baina ez dakigu ziurtasunez iritsiko den ere. Etsigarria da". Gaur bertan, Tolosako Udalarekin harremanetan jarri dira. "Udalari mesedez eskatu diogu Movistarrera deitu dezan presio modura eta Tolosako auzo bateko biztanleek duten egoeraz kexatzeko; euren erantzuna izan da enpresa pribatua dela eta norberak duen kontratuan udalak ez duela ezer egiteko. Ez dugu ulertzen gure ordezkari politiko batek erantzun hori ematea. Arazoa ez da bizilagun batena, baizik eta bere herritarrak diren auzo batena. Arazo honen jatorria utzikeria da, eta kasu honetan, enpresa handi batek duen boterearen aurrean administrazioaren utzikeria", adierazi dute bizilagunek.
 
Movistarrera deika eta deika ari dira Bedaioko bizilagunak, "gaur gutxienez, barkamena eskatu digute, baina ez digute irtenbiderik ematen".

 

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!