Kalejiran eta dantzan pasatu dute Zaldunita bezperako goizaren zatirik zabalena eskualdeko dantzariek. Gaztetxo asko animatu dira hankak dantzan jartzera, Udaberri dantza taldeak antolatzen duen hitzorduan.
Trianguloa izan dute lehen elkargune, 11:30ean. Hortik aurrera, bi talde handitan banatuta Tolosako kaleak alaitzen aritu dira, plazaz plaza geldialdiak eginda, dantza batzuk eskainiz. Eguerdian, bi taldeek bat egin dute Trianguloan ondoren Euskal Herria plazara elkarrekin joateko, eta han, azken saioa eskaini ostean, galdutako indarrak hamaiketakoarekin berreskuratu dituzte.
