Inauterien muinera bueltatzeko gogoa, eta neguko emanaldi bat prestatzekoa. Biek bat egin zuten, duela zenbait hilabete, Udaberri dantza taldeko kideengan, eta horixe izan zen Gaur txantxo naiz emanaldia prestatzen hasteko ernamuina. Ostiral honetan izango da, 20:30ean hasita, Tolosako Zerkausian.
Euskal Herriko inauteri ospakizunak erakutsi nahi dituzte, hainbat kultur adierazpen baliatuz, eta fokua jarriko diete, gainera, Lizartzako, Amezketako eta Abaltzisketako inauteri dantzei ere. Momentuko taldekideek lehen aldiz dantzatuko dituzte, eta zor bat kitatu dutela sentitzen dute.
Izan ere, ikaste prozesu bat izan da ikuskizuna lantzea, taldearentzat: dokumentazioa, dantzak eta eskulana. Finean, jardun horrek taldea zailduko duela diote, eta aurrera begira prozesu baliagarria izango dela eurentzat.
Emanaldia doan eskainiko dute, eta Zerkausian, "inauteriak kalean bizitzen direlako", eta "Udaberriren egitekoa bere jakintza herriari transmititzea delako".
