Asteburuko hitzorduak atzean utzita, bihar ekingo diote, berriz, egitarauari, eta aurtengoak badu hitzordu berezi-berezi bat: Estebania erraldoia aurkeztuko dute.
Auzolanean eraiki dute Estebania, eta Oihana Sanchez auzo elkarteko kideak azaldu du, San Esteban auzoko emakumeei omenaldi bat egiteko asmoa izan zela auzolanaren pizgarri: «Garai batean, gure auzoko emakumeak barazki eta esnekiak saltzera jaisten ziren herrira, eta horiek omendu nahi izan ditugu. Bizimodu hori galdu da eta, ondorioz, irudi hori ere bai. Gure seme-alabek ez dute hori ezagutuko eta, beraz, omenaldia egitearekin batera, ezagutza hori ere transmititu nahi genuke».
Zenbait hilabetez aritu dira lanean, josten zekitenek arropa josiz, eskulanetan trebe direnak burua eraikiz, eta iturgin zenbait erraldoiaren besoetarako materiala moldatuz.
Horrela, erraldoiaren aurkezpen ofiziala bihar, 19:00etako pintxo potean egingo duten arren, larunbateko krosean lehenengo irteeratxoa egin zuen Estebaniak, haur eta gaztetxoen gozamenerako.
San Esteban auzoko XXXII. kultur asteko egitarau osoa ikusgai dago www.ataria.eus -eko agendan.
