Tolosako EAJk gaur goizean egin du agerraldia hauteskunde programako bosgarren eta azken ardatza azaltzeko, gobernantza ereduari lotutakoa. Olatz Peon alkategaiak hartu du hitza eta orain arte bezala lan egiten jarraitzeko konpromiso irmoa erakutsi du, "kudeaketa onean oinarrituta, gertutasunetik, gardentasunez eta tolosarrekin zein herriko elkarte eta eragileekin elkarlanean jardunez".
Ezinbestekoa da Peonentzat "tolosarrengandik gertu" egotea: "Parte hartze prozesuak Udaleko egunerokoan barneratuak izan daitezen, parte hartze digitala sustatu eta informazio kanal pertsonalizatuak landuko ditugu".
Beste hainbat proposamen ere egin ditu: "Herritarren arreta zerbitzua indartzea, Udate APP-a mugikorretara egokitzea, webgunetik erreserbatzeko sistema ezartzea eta telematikoki egin daitezkeen tramiteak areagotzea". Gardentasunari begira, kanal pertsonalizatuak sortuko dituztela azaldu du alkategaiak, Udalaren jardunaren baitako informazio guztia herritarren eskura jartzeko.
Agerraldiaren amaieran, igandera begira jarri ditu begiak: "Iraganera bueltatu edo etorkizunerantz egin, horixe da igande honetan tolosarrek erabaki beharko dutena; guk anbizio handiko proposamen zehatzak ditugu, landuak, etorkizuneko Tolosa eraikitzen jarraitzeko".