"Ez gara hutsetik abiatzen, sei urteko ibilbidea egin dugu, eta epe labur horretan pauso esanguratsuak eman dira", azaldu du tolosarrak. Etapa berrirako helburu argiak markatu ditu Gure Esku Dagok, eta horretarako, pauso eraginkorrak eman nahi ditu. Hori bai, testuinguru honetan hainbat horma eta harresi izango dituela parez pare jakitun dira herri mugimenduko kideak, eta horiek gainditzeko beharra adierazi dute. "Erabakitzeko eskubidea delitu bilakatu nahi dute, beraz, arazoa baldin bada erabakitzeko eskubidea ez dela legezkoa legeztatu egin behar dugu, posible delako, eta horretara goaz, etorkizuna erreferendum bidez erabaki ahal izateko".