Goizeko lauretarako Leidorreko atarian ilara egiten hasi dira herritarrak zezen-plazarako sarrerak erosteko asmoz. Ilara horretan 25. zenbakia duen Onintza tolosarra goizeko seietarako gerturatu da. Internetez ezin izan zituen sarrerak eskuratu, eta horregatik sarrerak eskuratzeko ilara egitea besterik ez zaio geratu.
Zezen-plazarako sarrerak eskuratzeko ilara egiten duen lehen aldia duela kontatu digu. "Umeengatik ari naiz, joateko gogoa dute, beraz, ez zegoen beste biderik". "Tranpa" egin duenik ere badela kontatu digu: "Goizean goiz etorri direnetako batzuk zenbaki bat baino gehiago hartu dituzte, batek zazpi ere hartu ditu". 16:00etan zabalduko dute Leidorreko leihatila, eta ordura arte senarrarekin txandakatuko dela kontatu du tolosarrak.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!