Tolosaldea, Goierri eta Buruntza eskualdeetatik egin dute kotxe karabana LABek deituta eta Tolosako Eroskiko aparkalekuan bildu dira. Alde batetik, soldata arrakala salatu dute eskuorriak banatuz eta pankartak jarriz, bai Eroski barruan, bai atarian. Beste aldetik, martxoaren 8ko greba feministan parte hartzeko deialdia egin diete langileei.
Atzo ere protesta eguna izan zuten eta bi ekimen egin zituzten bat Nafarroako Gobernuan eta bestea Emakunden. LABeko Haizea Mendiak azaldu duenez, instituzioak interpelatu nahi zituzten soldata arrakala ez delako kopuru bat bakarrik eta ez delako kasualitate hutsa. "Hau arazo politiko bat da sistema bera matxista delako. Guk sistema irauli nahi dugu eta Emakunde okupatu genuen sinbolikoki, benetako neurriak eskatzen ditugulako". Gaineratu du, sistema bera feminista izan beharko litzatekeela soldata arrakalarekin amaitzeko.
Mendiak esan duenez, hori ere gertatzen den arren, soldata arrakala ez da bakarrik lanpostu berdinean gizona eta emakumea badago emakumeak gutxiago kobratzen duela: "Bereziki da emakumeei ematen zaizkigun lanak gutxiago baloratuta daudela: zaintza lanak, garbiketa, ostalaritza, merkataritza... eta hortik dator soldata arrakala". Gaineratu du enpresetan ere, normalean, gizonek kargu altuak izaten dituztela eta emakumeek kategoria baxuagokoak. Hori kasualitate bat ez dela eta arazo politiko bat dagoela azpimarratu du.