Soroaren finalak erabakita geratu dira

Tolosaldeko Ataria 2019ko urt. 21a, 13:59

Migel Soroa Ogi Berri Txapelketaren bigarren finalerdiak larunbatean jokatu ziren Beotibarren. Murua-Gartzia; De La Fuente-Agirre eta Salaberria-Otaduy izan ziren aurrera egin zutenak.

Etorkizun mailako finalerdia bizkorra izan zen. Murua-Gartzia 22-9 nagusitu ziren Mata-Aizpitarteren aurka. Hasieran zabaldu zuten tartea eta hortik aurrera kontrolpean izan zuten partida irabazleek. Muruak aurrean zazpi tanto egin zituen. Gartzia atzean bikain ibili zen, tanto bat eginaz eta bi kalerekin.

Jubeniletan ere antzeko partida joan zen. Irabazleek tartea segidan zabaldu zuten eta erraz iritsi ziren 22ra. Unai Alberdi-Elosegi 7an geratu ziren. De La Fuenteren partida borobila izan zen. Sakez sei tanto lortu zituen eta jokoan lau. Horrez gain, ez zuen kalerik egin. Agirre atzelariak ere ez zuen kalerik egin, baina bai hiru tanto lortu.

Finalerdietako azken partida eliteen mailakoa izan zen. Peru Labaka zizurkildarrak Zezeagarekin osatu zuen bikotea. Aurkariak nagusitu ziren, ordea. Salaberria-Otaduy 22-17 nagusitu ziren. Jaialdiko partida ederrena izan zen. Aurrean ikuskizuna eskaini zuten bi pilotariek, tanto ugari elkarri sartuz. Labakak 10 tanto egin zituen eta Salaberriak 12. Atzean, Zezeagak 6 pilota galdu zituen; Otaduy-k lau.

Finalak urtarrilak 26, larunbata, Tolosako Beotibarren

  • Jubenilak: De La Fuente-Agirre/Lasa-Cuairan
  • Etorkizunekoak: Murua-Gartzia/Julen Egiguren-Apezetxea
  • Elite mailan: Salaberria-Otaduy/Zubizarreta-Uriondo

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!