Arria V.ak gaur aurkeztu du marka saiakera Tolosako Kantabriko tabernan. Martxoaren 17an izango da eta Azpeitian hasiko da proba, zezen plazan. 20 kana-erdiko ebaki beharko ditu bertan. Ondoren, Herniora joango da. Puntara igo ondoren Tolosara jaitsiko da. Guztira 26 kilometro inguruko ibilbidea egin beharko du. Azkenik, Tolosako zezen plazan beste 20 kana-erdiko ebaki beharko ditu.
5 ordu eta 10 minutu azpitik amaitzen baldin badu lana, Peru Eraikuntzak enpresak 6.000 euroko saria emango dio Arria V.ari. Denbora horretatik gora joaten baldin bada, saria 3.000 eurokoa izango da.
Marka saiakerari ofizialtasuna emateko, herri kirol federazioa eta mendiko federazioa egongo dira kontrolatzen.