Iñaki Calvillo: "Gatazka honetan Hezkuntza sailak badu zer esana"

Zer-nolako eragina izango du greba deialdiak Herrikiden?

Haur eskolan dabiltzan hamar irakasleetatik seik egingo dute greba hiru egunotan. Haur Hezkuntzan dabiltzan 45etatik 24k eta DBH eta Batxilergoko 40 irakasleetatik bakarrak egingo du. Orain arte, ez da posible izan patronala eta sindikatuen arteko elkarrizketa eta horregatik astelehenean bildu eta bozketa egitea erabaki genuen. Iraupenaren inguruan ardura eta kezka ere badugu eta zortzi egun izan beharrean, batzuei gehiegi iruditzen zitzaien, eta gora eta behera ibili ondoren, ostirala arte, hiru greba egun egitea erabaki dugu.

Guraso elkarteak protestan ibili dira, zortzi eguneko iraupenarekin.

Norberak bere aldera ikusten du egoera. Ikusita, hamar urteko hitzarmena ez dela berritu, badirudi azkeneko pauso hori egiten ez bada, ez dagoela mahai baten bueltan esertzeko aukerarik.

Eskolak prestatzeko eta ikasleen jarraipena egiteko orduak eskatu dituzue.

Bai, azken finean, hezkuntza aldatu egiten da, metodologiak aldatu egiten dira eta horrek eskatzen du beste denbora bat. Zama eta karga bat dauka lanketa horrek eta orduak behar ditugu.

Haur hezitzaileek eta hezkuntza laguntzako espezialisten egoera zein da?

Ordu asko sartzen dituzte. Egoera hobetzea eskatzen dugu. Batez ere, irakasle horientzat, ordu osagarrien eskaera dago.

Eredu bat ere eskatu duzue, balizko itxieren aurrean.

Horrelako egoera bat gertatuko balitz, eta eskola bat itxiko balitz, Kristau Eskola osatzen dugun irakasleriaren artean, nolabait kanpoan geratzen den hori, beste eskola batean kokatzeko aukera aztertzea eskatzen dugu.

Nola ikusten duzu gaurtik aurrera egingo duzuen greba?

Herrikide eskolan, umeen arteko gatazka sortzen direnean Adostokia izenekoa dugu. Adostokian, hitza da arma eta akordioak lortzeko, ezinbestekoa da hitz egitea eta elkarrizketa sortzea. Itxaropentsu nago, hitz egin ondoren ea zerbait aurreratzen dugun. Ea posible den hitzarmen berri bat. Bestetik iruditzen zait, arazo edo gatazka hezkuntza mundukoa dela eta Hezkuntza sailak baduela zer esana.

Nola izango da egoera hiru egun hauetan?

Greba egiten dugun kasuan zerbitzu minimo batzuk daude eta horiek beteko dira. Ikasleek bertaratzeko aukera izango dute.