Hasi berri da atletismoko denboraldi berria, eta osatu dute taldea Tolosa CF Atletismokoek.
Aurtengo helburu eta erronkak bete ahal izateko lau fitxaketa egin dituzte. Tartean, ordea, bi lagunek, Maria Lasak eta Nerea Muruak, taldea uztea erabaki dute.
Puntuak lortzeko eta taldea sendotzeko asmotan fitxatu dituzte lau atleta. Batetik, Markel Acosta, hesilari ordiziarra, jubenil mailan ariko da lehian. Bestetik, Jon Ander Burgos; urte batzuk atletismotik kanpo eman ostean, bueltatzea erabaki du, eta bere betiko mailara iristeko gogoz agertu da. Iker Martinez, Urola garaiko erdifondista, Unai Hernandezen eskutik iritsi da Tolosako taldea indartzera. Laugarren fitxaketa, Aitor Regillarena izan da. Orain arte triatloi munduan aritu den tolosarrak, krosetan parte hartzeko gogoa erakutsi du, eta talde tolosarrarekin fitxatu du.
LASA ETA MURUA
Fitxaketez gain, badira beste talde batzuetara joateko hautua egin dutenak ere. Maria Lasa irurarrak Playa de Castellonekin fitxatu du, eta Nerea Murua altzoarrak pistetara bueltatzea erabaki du, baina, Atletiko San Sebastian taldearekin egin du fitxa.