Aranburu jauregian dagoen erakusketaren inaugurazioan, beraien lanak ikusgai dituzten 19 eskultoreetatik ia guztiak izan ziren. Bakoitzak bere lanari buruzko azalpena eman zuen, erakusketatik bisita gidatu moduko bat eginez. Askotariko materialez egindako artelanak daude erakusketan, eta hauek sortzeko askotariko kontzeptuak erabili dira, artista bakoitzak bere hizkuntza eta sormena jarriz.
Bisita gidatua hasi aurretik egin zioten Antxon Elosegiri omenaldia. Txalo zaparrada jaso zuen eta agurra dantzatu zioten. Elosegik eskertu zuen jasotako omenaldia, eta azaldu zuen beretzako garrantzitsuena dela "herriaren kontzientzia hartzea. Tolosan dauden eskulturak oso ondare ona da, eta zentzu horretan egiten den guztia ona da herriarentzat". Elosegik, bide batez, Aranburun eskulturak eta artelanak jarri dituzten artistei euren lana eskertu zien: "Sentimendua, bihotza, burua jartzen dute; materiala erabaki, zer egin, nola egin... Obrak ikusita, hor daude meritu handia duten artistak".
