Errementari Kaleko saltzaileek kalea girotzeko eta atontzeko egindako lana zapuztu dute berriro ezezagun batzuk. Sanjoanetan Marionak puskatu zituzten; oraingoan, udazkenaren eta Mikologikaren aitzakian sortu dituzten perretxikoak kendu dituzte.
Urriaren 11n saltokietako sarreretan perretxikoak jarri zituzten, baina bi egun baino ez dute iraun. Giro Kaleko saltzaile batek sare sozialetan jakitera eman duenez, larunbat gauean guztiak kendu zituzten.
Gertakariak merkatari eta herritar zenbait haserretu ditu berriro ere: «mezu honen bidez gure haserrea, tristura eta dezepzioa adierazi nahi ditugu, Errementari kaleari bizia emateko egiten dugun lanaren aurrean jasotzen dugun errespetu faltarengatik. Guk egindako lana pikutara bidaltzen dute», aitortu dute Errementari Kaleko saltzaileek. Egileei ere galdera luzatu diete: «Horrenbeste eskatzea da dendariok Tolosako kaleak apaintzeko egiten dugun lana errespetatzea?».