Egun osoan zehar, Tolosako Triangulo plazan dira Abbay elkarteko kideak, elkartasun azoka eginez. Bertan bildutako dirua, Etiopiara bideratzen dute, bertan dituzten hezkuntza eta osasungintza alorreko proiektuak bideratzeko. Bide batez, Tolosaldeko biztanleei Etiopian dauden beharrak erakusten dizkiete.
Iaz 3.000 euro bildu zituzten haurreskolaren edota hezkuntza sistema alternatiboaren proiektuak laguntzeko. «Tolosa beti ongi portatzen da, asko laguntzen du, eta horregatik errepikatzen dugu urtero», azaldu du Uzuri Fernandez Arostegi, Abbay elkarteko kideak.
Etiopian laguntza handia behar dutela nabarmendu du Fernandezek: «Jendeak esaten digu hemen ere behar asko dituen jendea badela, baina beste behar mota batzuk daude Etiopian, eta horiek konpontzeko egiten dugu lan Abbay-n».