Japoniarrak, «liluratuta» Tolosako Erraldoi eta Buruhandiekin

Tolosaldeko Ataria 2018ko abu. 11a, 10:58

Japoniako biraren bigarren egunean, kalera irten da Tolosako Erraldoi eta Buruhandien konpartsa. Tolosako espedizioko kideen esanetan, Iidako herritarrak txundituta geratu dira, «erabat harrituta».

Japoniako Iida Puppet Festa jaialdian ari da Tolosako Erraldoi eta Buruhandien konpartsa. Ostegunean egin zuten estreineko agerraldia, eskola batean. Besteak beste, erraldoiak nola muntatzen diren irakatsi eta nola dantzatzen diren erakutsi zieten bertaratutakoei.

Atzo, ostirala, lehen emanaldia eskaini zuten kalean; emanaldi bikoitza, gainera. Gozatu egin zuten japoniarrek: «Ikustekoa izan da ikusleek egin diguten harrera. Txundituta gelditu dira, erabat harrituta. Beraiekin sortu den harremana eta elkarrekintza ikustekoa izan da», azaldu du Beñat Sarasola dultzaineroak. Bidali dituzten argazkiak ikusi besterik ez dago, hori horrela izan zela ondorioztatzeko.

Emanaldiaren amaieran, buruhandiekin argazkiak ateratzeko aukera izan zuten, baita sorbalden gainean jartzekoa ere. 

Gaurkoan ere emanaldi bikoitza eskainiko dute, 10:30ean eta 14:00etan. Eta bihar egingo dute azken agerraldia, beste tailer bat eskainiz.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!